港媽、買樓與浮士德的交易
身邊很多好女孩，她們的故事就是一眼淚水。A 小姐和男友拍拖多年，在當今世代一直難得相愛，唯一到談婚論嫁，立即出事。
A 小姐：阿媽，我想結婚！
A 媽：你才廿幾歲，咁急結婚做乜？阿邊個邊個又冇樓，學歷又麻麻，嫁畀佢你地住邊？
A 小姐：...租....屋囉！
A 媽：租？萬一有事點算？萬一失業點算？阿女你聽我講，結婚呢 d 野唔急得o架，要慢慢來！
A 小姐：咁買唐樓囉，其實裝修完都可以住！
A 媽：咩話？買唐樓？阿三姑佢屋企個咩業主咩法團日日鬧交，又話貪污又貼咩大字報，嘈左幾年咩議員、政府乜都幫唔到手，你買呢 d 樓返來，點住？何況我一直都唔鍾意佢......
A 小姐：但係我地都拍左成七八年拖，佢過節都有上來食飯送禮，點解你地始終都唔鍾意佢？
A 媽：我邊有唔鍾意佢？我只係為你好！我一眼就睇得出，佢信唔過；你睇，幾廿歲人仲成日沉迷打機，又鍾意睇漫畫，做左咁多年野，都冇來上進心！上進心呀女，你嫁畀佢，就一世o架啦，我都係為你好..
A 小姐：你為我好，點解唔畀我嫁畀佢？身邊個個唔係拍散拖，就係連拖都冇得拍，難得佢對我咁真心，對你地都做到足，我真係唔明你地諗乜！
A 媽： 女呀女，你仲大把青春，慢慢來，慢慢來......
B 小姐和男友 B 仔拍拖多年，在當今世代難得港媽同意成婚，就在大家商討婚禮的時候...
B 媽：B 仔我一直都好信任你，拿，其實我地都好易相與o既，酒席方面我地希望可以女家有三十席，禮金就好意頭，三十八萬八千蚊啦！
B 仔：er....er..... er..... 準外母大人，但我唔係太夠錢畀首期，你知啦而家 d 樓價咁高，我地好難供得起，而且三十幾萬...都唔係少數目...
B 媽：B 仔，你地年輕人辛苦我係知道，但我供書教學，養大 B 女咁多年，唔通果 d 又唔使錢咩？我已經好體談諒你地啦，B 女你都知，前排阿二姑媽嫁女，佢地在會展開成百席，三表哥娶新婦，都去迪士尼擺酒啦，人地閒閒地都收八十八萬八，家下我只係希望你盡下孝心，畀三十八萬八咋喎，你咁都做唔到，你唔係要我丟架嘛？我在成班親戚面前，點抬得起頭做人？
B 女：阿媽你........鳴.............................我好醜，點解我阿媽要賣女？乜唔係男女平等咩？乜唔係女大女世界，鍾意就得咩？點解永遠都係講一套做一套？點解要迫我買樓？點解要迫我嫁畀我唔鍾意的人？點解我想拍拖就要我讀書，我讀完書又搵唔到錢又要我嫁畀有錢人？我的人生目的係乜野？
B 媽：我都係為你好之嘛，你咁咩態度？你不孝！
上述的故事兩則，只不過係林忌親耳聽過無數真人真事的冰山一角，更荒誕的，更奇情的，更離譜的，還有很多，可是寫出來一定被人罵我：根本沒有這種事情！那個是假的！
對，很多人都想問問，其實港媽以及一眾二代的老人家，佢地想點？平日就岸然道貌一副君子，不停說教要仔女畀心機，努力讀書努力向上，向上來做乜呢？目的係乜呢？係為左「出人頭地」、「為屋企爭光」、「搵多 D 錢」、「畀屋企更好的生活」。
冇錯，呢番話我地聽左十年，聽左廿年，聽左好多年，每次家長都用呢番說話，去教訓子女，去禁止子女做 A，又禁止子女做 B，子女話：「我要讀藝術！」－－家長誓死反對；子女話：「我要研究人生的意義！」，家長一哭二鬧三上吊，威迫利誘禁止子女走自己的路，一定要聽教聽話，去跟隨家長的偉大計劃去做－－偉大計劃係乜野呢？就係「努力向上！勤力！一定得！出人頭地！」－－就係用金錢，用權位，去衡量年輕人的生命，年青人自己點諗？重要嗎？年青人的人生想點樣走？重要嗎？唔緊要，最緊要在學校聽老師的話，在公司聽老闆的話，只要你地聽話，就有美麗的未來！就有輝煌的將來！
對，林忌仲識得一位 C 小姐，身讀名校o既佢，多年來都係任何家長、老師眼中品學兼優的乖乖女，求學時期拒絕拍拖，當年未有拔尖但會考 8A ，剛剛好佢報大學那年，董建華在施政報告內，大談生化港的偉大未來！
「生物科技好呀！特首都說要全力發展生物科技！你生物科又年年都咁好成績，不如就讀生物科技啦！」－－C 爸如是說。
C 小姐結果如何呢？事業當然不問可知，甚至還因挫折患上了精神方面的問題，面目姣好卻一直未能遇到合意的郎君；對，她多年來都聽老師的話，聽家長的話，聽政府的話，一直都很努力，換來的是一個怎樣的結局？
對，努力而「事業成功」絕不是必然的；可是這些年來，一直貫輸她這樣價值的是誰？一直貫輸叫她如此思考的是誰？甚至可以想像有一天，如果 C 小姐終於遇到她的如此郎君，會不會又出現上述 A、B 小姐的遭遇呢？ A 家會唔會嫌個男仔窮？B 家會唔會嫌份禮金酒席唔夠體面？上述所有做決定，以大家長主義強壓下一代聽從的，是誰？是我們這些聽教聽話的傻仔嗎？
對，就是我們這班聽教聽話，做好學生，做好市民的傻仔；我們這群人之中，那些早獨立，早看穿這個把戲的人，就受到家長、教師、制度的聯手迫害，用分數、用金錢、用考試去控制年輕人；那些聽教聽話，隨波逐流，甚至僥倖成為了專業人士，卻仍然無法達到港爸港媽的目標o既，就在人生大事，在決定人生的後半時遇到迫害。
我們力盡艱辛，逃離一個地獄，卻訝然發現，眼前的唔係天堂，連凡間都唔係，而係另一個地獄！
好呀，買舊樓買唐樓，港媽肯嗎？好呀，唔好買樓去租樓啦，港媽肯嗎？在報紙發膠音的一連串膠人，是你們是傻的嗎，還是當我們是傻的嗎？還是身邊永遠見不到一個港媽？為甚麼我地就要忍耐，但港媽收禮金卻不用忍耐？港媽控制子女卻不用忍耐？
好呀，港媽畀你買唐樓，校網呢？成班後生仔冇希望，冇人生，要運動冇場地，要上網又要規管，唔健康呀！冇益呀！用過濾器啦，用 56k 唔好用寬頻啦！讀多 D 書啦，讀多 D 書對你有益呀！
有益？不如送高官去驗腦呀，佢地記得幾多書本上的知識？當年佢地考試的知識，佢地學了幾多？其實讀書係為左乜野？求學不是求分數？你食錯藥呀？定係食飯焦左呀？
對，唔好比較，記住唔好比較；佢前言不對後語，你唔應該諗咁多，你反政府呀？你反權威呀？佢講過唔算數，包生仔呀？講你又信呀？佢就日日鮑魚，你就日日多舊魚，唔好比較，千萬唔好比較，鬼叫你唔生早廿年呀？
答：『抵你死啦，望下索馬里、埃塞俄比亞，你班後生仔，真係「身在福中不知福」呀！世界上有好多人慘過你地呀！』
問：「哦？咁歐洲呢？咁美國加拿大呢？」
答：「佢地都有好多問題呀，冇絕對的幸福呀，總之唔好諗咁多啦，要努力！」
問：「努力？我仲努力來做乜？努力的意義是甚麼？」
答：「要樂觀！要達觀！唔好諗咁多，總之努力！」
問：「我已經好努力」
答：「你努力得唔夠，明冇？」
問：「我身邊個老友已經日捱十幾個鐘，結果提早引發 cancer 死埋，你仲想我點努力？」
答：「你太悲觀啦，唔好只係諗衰野，總之努力啦！」
問：「................................................」
答：「努力！」
問：「但係人生的意義，係做一隻聽話的狗嗎？係做一隻冇目的、冇思考、冇要求、冇腰骨的爬蟲類生物嗎？」
某人一臉驚恐...
問：「乜我地中國人的命特別賤嗎？」
問：「乜我地的行為被你們控制十幾廿年，還唔夠嗎？」
問：「我地唔可以用二代人的標準去追求物質，要用四代人的標準去追求物質，冇問題，咁我地可唔可以用四代人的標準去追求精神生活？我地可唔可以用四代人的標準去追求公平公正民主自由的社會？」
答：「而家經濟差，專心搵錢啦！要搞好經濟先！」
問：「乜唔係話應用四代人的標準，唔好用二代人的標準咩？」
答：「生活享受就應用四代人標準」
問：「咁工作係唔係用四代人的標準？」
答：「工作就要用二代人刻苦耐勞的標準，都話你班年輕人唔吃得苦！」
問：「工作要我忍受，咁民主自由呢？可以四代標準未？」
答：「你地年輕太衝動！你地年輕人未成長！應該聽阿爺的話，應該聽老闆的話！用你地的標準，香港會大亂，會陸沉！」
記住了，工作就要用二代人的標準，努力向上
生活就要用四代人的標準，向非洲出發！
搵錢的時候，就要用四代人的標準，要識得創新，要突破困局！
創新的時候，就要用二代人的標準，要一切照舊，要用番幾十年前的方法！香港一定得！唔好搞咁多事，努力！奮鬥！人定勝天！
其實，大家係唔係弱智的呢？其實，究竟係邊個需要驗腦？
強烈要求立法會強制立法，立法禁止家長販賣人口，立法禁止家長強迫子女買樓，立法禁止中國人嫁娶收禮金，因為中國的大家長主義，就好似纏足一樣，係人類文明史上的一大污點，係防礙人類進步的其中一項最大阻礙！
伸延閱讀：
四代香港人的回答
沒有留言:
發佈留言