不吐不快 - 香港警隊和韓國農民

------- 原始郵件 -------
主題: 不吐不快 - 香港警隊和韓國農民
日期: 20 Dec 2005 11:49:25 +0800
寄件人: 乜水"
News 討論群組: welcome.koonleeyuen

先講明, 我唔係想搵交嗌, 只係想表達個人意見, 岩聽就睇, 唔岩聽想討論下, 請唔好用攻擊性字眼, thx.

我覺得示威者今次示威, 有佢目的係可以理解, 但佢地太過份, 示威本身係要表達訴求要引起其他人既注意, 其實韓農一黎香港, 全世界都注意到佢地, 佢地去邊都有記者佢地想要表達咩意見, 全世界都知, 但點解仲要破壞香港既和平呢, 要遊行, 要叫口號真係好合理, 但衝擊, 跳海, 拆欄杆掉落海, 用旗桿打警察, 踩斷鐵碼既鐵枝做武器表達咩呢? 只係表達佢地要漠視香港既和平, 漠視香港人一向和平爭取既傳統, 講得簡單d, 直情係唔俾面

呢幾日, 不斷睇好多唔同既newsgroup, 支持韓農既人有好多, 但呢d人, 係咪唔清楚佢地支持既, 應該係反世貿呢件事, 而唔係支持韓農既行為呢.支持者既立場係, 香港警察唔應該用武力鎮壓, 但大家問心, 唔用催淚彈, 唔用胡椒噴霧, 唔係咁做, 韓農點會受到控制, 你估下韓農入到會展, 又用咩"和平"手段去表達意見呢, 可能自殺, 可能攻擊人, 可能放火, 可能放低封信就走, 係點無人知, 但佢地記錄唔好大家知, 邊個夠膽take呢個risk呢.

警察既工作, 係維護法紀, 韓農一直破壞法紀, 警察拘捕佢地, 又有咩唔妥呢.唔好一面倒話警方用過份暴力, 不如睇下另一面, 韓農用鐵碼係咁撞警察防線既片段丫,真係唔覺得係暴力?

有人話韓農都好和平丫, 衝過左防線, 成功左就坐定俾差人拘捕, 但, 殺左人坐晌度俾警察捉, 係咪代表呢個人無辜呢...

講左好多, 可能好多人都準備反駁, 但我想重申一次, 我唔係想嗌交, 只係想表達下我自己感受, 我知wto係猛虎毒蛇, 我亦知韓農為乜反wto, 不過, 我反對韓農晌香港既行為,反對佢地當香港法律無到, 反對佢地漠視和平, 反對佢地破壞公物, 以上我只係以一個香港市民既立場講.